【港超專版】面對抨擊 門仔靠Rock發洩

作者:Victoria 發表日期:2017-10-31 00:03:01

「不管身邊始終不停有冷笑侵襲……」陽光元朗門將彭梓鍵拿着電子結他,自彈自唱Beyond的《命運是你家》,感懷近年備受敵意網民猛烈抨擊,相當「在意」卻又無從反抗,惟有以搖滾之力打鼓彈結他發洩!「從沒埋怨,苦與他同行……」歌詞中所指的「他」,正是帶給「門仔」喜怒哀樂的足球!

花名「門仔」的彭梓鍵近年成為某些網民針對的「火頭」,他也直言無奈得很:「我問過自己係唔係咁罪大惡極,要畀人鬧到咁嘅樣,其實我都盡咗力去踢好每場波啦,我知道對付呢啲留言嘅最佳方法,就係唔好理佢,但我真係好『在意』,造成好大壓力,如果唔係有結他同鼓畀我發洩,話唔定我去咗跳樓!」

投元朗加人工結他做獎勵

於中學年代因喜歡Beyond而去學結他與打鼓,但「門仔」畢業後投身足球圈,因薪金微薄暫時放下這興趣,直到3年前轉投元朗有好表現,獲得加人工後第一件事就用了兩千多元,買了一支電子結他來獎勵自己:「之前支結他係讀書時興趣班嗰啲,雖然經已蓉蓉爛爛、音又唔準,但每次拎上手都好似畀到能量自己咁,唱起Beyond嘅歌都能夠觸動心靈,所以恨咗好耐想買支新嘅,得閒用嚟陶醉吓都好!」

打鼓守龍都係穩守最後

講到結他與打鼓,「門仔」較喜歡後者:「其實打鼓同守龍門好似,兩個崗位都係成Team人企最後嗰個,又係負責控制全隊節奏。我一向都唔係做主角嘅人,我都係啱做後面支援嘅角色,得閒畀幾個Solo鏡頭我就夠!」今年到日本旅遊時,「門仔」見到一套超低價的電子鼓,二話不說便買了運回香港!「門仔」直言自己雖家住新界粉嶺圍村,但在家打真鼓會製造嘈音騷擾鄰居,惟有電子鼓才可解決這個「土地問題」!

問到剛在今年暑假成功向女友求婚的「門仔」,會否計劃在婚禮上唱情歌氹老婆。他表示:「呢個係秘密!講咗出嚟仲邊有驚喜!佢一直都好鍾意鄭伊健首《一生愛你一個》,到時睇吓會唔會有全新方式去演繹呢首歌啦!」



「門仔」唔Mind競爭:「坐冷板都要識點坐」

不經不覺,彭梓鍵已踏入30歲,他在球壇經歷了多年後備生涯及磨練,才能站穩陽光元朗正選!不過,今屆季初「門仔」因傷倦勤,正選位置交予21歲的陳嘉豪把守,並有穩定演出。被問到怕不怕要再一次返回冷板櫈時,「門仔」反而樂見有競爭:「坐後備席我好有經驗!經驗話我知即使做後備都要做好準備,因為出場機會話嚟就嚟,如果只係識自怨自艾唔去提升自己,機會嚟到都唔會把握到!老實講,如果球隊拎到好成績,邊個打正選有咩所謂!」

後浪湧到恭喜唔妒忌

彭梓鍵更直言上季門將位置競爭不大,差不多全部賽事也要上陣,下半季出現疲態是其表現走下坡的主因。

今屆港超聯不約而同有陽光元朗的陳嘉豪(21歲)、夢想FC的謝家榮(18歲)、理文的陸平中(23歲)及標準流浪的黃子揚(21歲)等年輕門將獲得正選上陣機會。問到打拚了多少個年頭才獲得正選的「門仔」會否妒忌這班後浪,他反而抱着欣賞角度:「這麼年輕就能打正選,就證明他們是有天分的!始終香港隊的守門員位置,過幾年後都要搵人接班,依家有多幾個選擇,對成個香港球壇都係好事!」


本文来源:http://hk.on.cc/hk/bkn/cnt/sport/20171031/bkn-20171031002411464-1031_00882_001.html

本文固定鏈接: http://www.acupuncturehk.com/31648.html
轉載請注明:Victoria 2017-10-31 00:03:01 於 香港資訊熱播 發表

上一篇: :下一篇
返回頂部