【有片】做手術一個月 伊巴咁快踢番波!

作者:Judith 發表日期:2017-06-04 14:51:01

伊巴堅骨骼精奇,做手術後一個月就踢得番波!呢名瑞典神鋒,於歐霸盃重創膝頭,到四月尾做大手術,估計要到出年一月先復出。但伊巴就多次重申,自己係「獅子」唔係正常人,肯定會比預期快好番,佢唔係得個講字,剛啱就PO咗段踢波片上IG,入面佢唔單止行得,仲要左右腳都踢到波。

伊巴喺片入面赤住雙腳喺草地練習,訓練員掟個波畀佢,佢反覆用左、右腳踢番個波畀助手,雖然仲唔算太靈活,但佢剛做大手術僅僅一個月,就行得走得仲踢到波,仲要佢已經35歲,呢個康復進度真係驚人。伊巴喺IG留言:「觸覺永遠不會消失。獅子康復不同人類」,堅抵佢成日認叻!

據伊巴經理人表示,呂布目前仍未決定來季前途,但佢會希望留喺曼聯。如果紅魔不留人,佢都想繼續喺英超發展。以伊巴要求嘅超高人工,相信得曼城、車路士可以滿足佢,如果佢下季掉轉槍頭打番曼聯,魔粉都應該幾心痛。


本文来源:http://hk.on.cc/hk/bkn/cnt/sport/20170601/bkn-20170601181131180-0601_00882_001.html

本文固定鏈接: http://www.acupuncturehk.com/13683.html
轉載請注明:Judith 2017-06-04 14:51:01 於 香港資訊熱播 發表

上一篇: :下一篇
返回頂部